එක්තරා එක් රැයක්...

ටික් ටික් ටික් ටික්...

තත්පර කටුවටත් වෙහෙසයි. 

මේ, තරු එකින් එක අහසට නැගෙන මොහොතයි. 

අහසටම ඇලුනු ඇස්, තරු එකින් එක විමසයි. 

දහක් - නැත සිය දහක් 

තරු කැබලි අතර වුව, 

හුරු පුරුදු තරු ඇසක් 

ඇසට ඇස ගැටෙන හැටි පුදුමයි...!

*** *** ***

 

වෙහෙසයි..

ඒ වුනත් 

තවම රැය ඇරඹුණා පමණයි.

රෑ කුරුල්ලෙක් ඈත හිඳ

රැයේ තත් සීරුවෙන් කොනහයි, 

බිඳුනු ස්වර හත අටක්

රැය පුරා නිදැල්ලේ පාවෙයි.

තරු එළියක් සොයා වෙහෙසුණු 

තවත් එක් දෑසක්

කදෝකිමි එළියකට රැවටෙයි,

ඔව්..,

ඇසක් නම් මුළා වී 

‍රිදුම් ‍නිදිවැරුමක්

වරක් වත් විඳ තිබිය යුතුමයි...

*** *** ***

"සමන් පිච්ච මල් ඉහිරුණු 

නිල් තණකොළ පිට්ටනියක්

වගෙයි අහස අන්න බලනු

කොච්චර ලස්සනද රෑට.."

කවියෙක් තව කවියකට

සීරුවෙන් ස්වර අකුරු අමුණයි..

කරුවලට රහසින් තාරුකා අතරත් 

ඇතැම් විට කවියක් ලියැවෙයි..

 

*** *** ***

හරියටම රෑ දොළහයි..

ඈනුමක් පිටකර - දෑත් දෙපසට දිගහැර

තරුවක් හුන් තැනින් නැගිටියි.

තව පෑ පහක් ඉතුරුයි,

සිගැරැට් එකක් ඇත්නම් කදිමයි..!

... ... ... ... ... ... ... ... ...

ටී ටයිම් ඉවරයි..!

ඉවසන්න, 

මේ අන්තිම කහට උගුරයි...

තවත් පෑ හතරකුත් මිනිත්තු පනහක් ම ඉතුරුයි...!

-මුදිත්-

2020.11.30

සිතුවම : "The Starry Night" by Vincent van Gogh

පසු සටහන : 

"සමන් පිච්ච මල් ඉහිරුණු 

නිල් තණකොළ පිට්ටනියක්

වගෙයි අහස අන්න බලනු

කොච්චර ලස්සනද රෑට" 

එස්. මහින්ද හිමි ගේ කවියකි.