පිනි මත ය - ඔය සිලිටි පා ලකුණ...

ඝනව එන සීතෙන්

මිහිදුමකි මා දෑස් මත්තෙන්..

හිරිකඩ ය - මල් පෙති මත

පිනි මත ය - සිලිටි පා සලකුණ,

දකිමි නැවතී මෙතෙකින්...

පසු හඹා එනු බැරි

මේ හැටි ම රළු පයකින්..

කොයි ලෙස ගලා ආවද

කෙටි කථාවක - දිගු ඡේද

නතර විය යුතු කුඩා තිතකින්...

හිරිකඩට එපිටින්

නුඹ ඇති නතර වී,

ඔය හිතට රිසි තැනෙකින්..

ශීතලම රැයෙහිත්

තුහින මිහිදුම් සළුව

තුරුළු කරගමි දෙඅතින්..

අතැර යනු බැරි සුවඳක්

තවමත් ඉතිරි වී ඇතියෙන්...

-මුදිත්-

2021.08.11

Painting: Mountains In The Mist by Joyce Combs

ඉතිරිව ඇතිද කිසිවක්...?

සුසුමක වෙස් රැගෙන
නික්මුණි, හදෙහි අවසන් පැතුම..
අවාලූ අහස් ගෙත්තම මත
දවාලූ වළා කැබලිති ය තැන තැන..

නොදොඩා බලා ඉමි
මතකය අතින් පිසලනු බැරියෙන්,
මුදවා ගමි දෙ'ඇස
ඈතින් ඈත යන ඔබගෙන්...

පියෙන් පිය නුඹ නික්ම යන,
මොහොතින් මොහොත
රිදුමකි හද කොනින් ලියලන..
හුයක් හෝ කිසි බැඳුමක්
ඉතිරිව ඇතිද තව අප'තර...?

-මුදිත්-
2021.07.24 

Painting: Imaginary friend leaving by Vladimir Hristov (2016)