නිමිත්ත: කුලී කාමරයේ බිත්ති පැල්මක දළු ලා වැඩෙන පැණි කොමඩු පැළයකි.
තෙත රැඳි ඉසව් නොදැනිම මගහැරුණාද
දළුලන හරිත රේඛා මග හැරියාද
සීනෙක පෙනුණු රහසක් මග කීවාද
නොලැබුණු යමක් වෙනුවෙන් මෙහි ආවාද
ඉඳහිට ඉහෙන දිය මිස, දිය මං නැතුවා
දුහුවිලි කහට කුණු මිස පොහොරක් නැතුවා
දළ රළු දළඹ මත මහ පොළොවක් නැතුවා
හෙමිහිට මුල් අදිනු මිස සරණක් නැතුවා
"ඉන්නේ දුම්බරයි මහ කලු ගලක් යට
කන්නේ කරවලයි රට හාලේ බතට"
සීනෙන් වැටෙන විට මතකයෙ මහ හෙළට
මා වාගෙම උඹත් යනවා ඇති ගමට
ජීවයෙ රටා ඇඳ රළු බිතු කොපුල පිට
දුර නෑයෙකු ලෙසින් මට පෑ සිනහ කට
කොටුවුණු අගනුවර මුල් නැති පොළොවකට
උඹත් මාත් දෙදෙනෙකු නොව එකෙකි මට
-මුදිත්-
30.11.2023
