මිස් වේවි මම හෙටත්...

"කොයි තරම් ෆොටෝ ගත්තත් බලන්නකො, ඔයාගෙ එකම එක ලස්සන ෆොටෝ එකක් නැති හැටි.."

-මිතුරියක්-

නින්නාද දී නැගෙන කවිය, එළිවැට බින්ද

දම් පාට හැන්දෑව අහස කෙළවර ඇන්ද

ගංගාව මත අතැර මහනෙලක මකරන්ද

සංකාව මේ තරම් වර නගනු කවුරුන්ද

දුරින් පිපි මදහසය මං ළඟට ළං නූන

පුරුද්දකි ඇස කඳුළ කැමරාව මට ගේන

දුරුත්තක සීතලෙන් හිරි වැටී හිත හීන

උරිස්සක සැඟවුනිද රෑ සඳේ ඇගෙ මූණ

බිඳෙන වැව් දිය මතම තව සොයමි සඳ බිඹුව

රිදෙන හැම මොහොතකම පිරිමදිමි සිත මුදුව

සිඳෙන බව දැන දැන ම තත් පෙළන රැය, නුඹව

ඇඳෙන සිතුවම් පෙළට අරගනිමි මතකැ'තුව

ඉස්සර ම මතකයක පැහැයක් ව නැවතුනත්

අස්වසන සුරත වී හිඳින්නෙමි නුඹ ලඟත්

දිස්නෙ දෙන තරු අතර සැරිසරමි, ඒ වුණත්

ලස්සන ම පොටෝවල මිස් වේවි මම හෙටත්

-මුදිත්-

27.12.2021

Painting: "Photographer" by Vera Dorkina

හඳුනාගැනීමේ පෙරෙට්ටුව

ඔබ මැවූ මිනිසෙකුම ද,
මේ දැවෙන්නේ මා පසෙකින්..?

බොහෝ කල් වැයකොට
කිම ඔබ මැවූයේ මිනිසෙකු,
ඔබ වෙත අඳ ව නොබැඳුණු...?

නුඹේ දෙව් නාමෙන්,
වෙන් කළෙම් මූල ධාතුවටම..
පළමුව අත් පයෙන්, 
දෙවනුව ගලින් - පොලු මුගුරෙන්,
ඉනික්බිති සුවිශුද්ධ ගින්නෙන්...

එයින් පසුවය දුටුවේ
ලෙය ද මස් ඇට නහර
සම සම ව ඇති බව..
ඔබ සුවච පුත්  මා මෙන්
එක ලෙසම පිහිටිය බව...

උතුම් වූ දෙවිඳුනි
බලා මේ පින්තූරුව,
දන්වා එවනු මැන දේව පණිවුඩයක
මේ දැවෙන මිනිසා ද
ඔබ මැවූ මිනිසෙකුම ද...?

-මුදිත්-
2021.12.04

සටහන: 

පාකිස්ථානයේ සේවය කළ ශ්‍රී ලාංකික ඉංජිනේරුවකු වූ ප්‍රියන්ත දියවඩන මහතා, සිය සේවා ස්ථානයෙහි අලවා තිබූ ඉස්ලාම් අන්තවාදී සංවිධානයක පෝස්ටර් පත්‍රිකාවක් ගලවා දැමීම හේතුවෙන්, එහි සේවය කල, එකී ආගමික අන්තවාදයට සම්බන්ධ පිරිසක් විසින් අමානුශික ලෙස, මරණයට පත්වන තෙක් පහර දී, ඉනික්බිති ගිනි තැබූ පුවතක් ඉකුත් දා වාර්තා විණි. එකී පුවත හා සබැඳිව සමාජ මාධ්‍ය තුළ සංසරණය වූ ඉහත ඡායාරූපයෙහි දැක්වෙන්නේ සිය පිරිවර විසින් වධහිංසනයට ලක්කොට මරා දැමූ "මිනිසාගේ" දැවෙන සිරුර පසුබිම් වන පරිදි හිඳිමින් 'සෙල්ෆි' ඡායාරූපයක් ලබා ගන්නා තවත් "මිනිසෙකි" .