මුණගැහෙමු?

ඉතින් හැම දේම ඉවරයි තමයි. ඒ වුණත් හිතවත්කම අරන් හෙටත් අපි මුණගැහෙමු? බැරි  කමක් නැහැ නේද?
                                                                                                       
                                                                                                         -කෙටි පණිවුඩයකින්-

අවාලූ රැය අඳුර සුපෙම් කැටයම් නෙළුව
චන්ද්‍ර බිම්බය දිලුනු ආකාස වැලි මළුව
හැකිලි හැකිලී ගොසින් සුපෙම්බර සඳ පළුව
පුංචි තරුවක් ලෙසින් මකන්නද රැය කළුව

පය තියා ගනු බැරිව හුරු පුරුදු සක්මනට
මුණ ගැසෙන්නේ කොහොම ඔය තරම් ඉක්මණට
නෙත් දෙකෙන් පෙළන්නද හදවතක තත්, බරට
පළන්දා තව කුමට පිනි කඳුළු ඇස් අගට

දෙපා යට ගලා යයි මහවැලිය - කඳුළු ගඟ
තිරිකුණාමල වෙරළ මත හැපෙයි විරහ රළ
ඇසෙන් ගිලිහී වැටුණ'යින් සොඳුර, කඳුළු බිඳ
නැගෙනහිර වෙරළ'ගින් ඇසෙයි ඉකි බිඳුම් හඬ

රළ නැගෙන රළ බිඳෙන තැන මඳක් නවතින්න
නිල නිලන රළ අතර සිහිනයෙන් කිමිදෙන්න
හිත පෙළන මතකයෙන් හැකි වෙතොත් වෙන්වෙන්න
මල් පිපෙන තැන හෙටත් මුණ ගැසෙමු - සමුගන්න

-මුදිත්-
2019.01.12