ජීවිතය ඩොලර් විස්සක්..!

අමෙරිකාවේ මිනෙසොටාහි දී පොලිස් නිලධරයෙකු විසින්, ඩොලර් විස්සක සොර මුදල් නෝට්ටුවක් භාවිතා කළැයි සැකපිට පුද්ගලයෙකු අත්අඩංගුවට ගැනීමේදී, දණහිසක් සැකකරුගේ ගෙල මත තබාගෙන හිඳීම හේතුවෙන් අදාල සැකකරු ගෙල සිරවී මියයයි.

-පුවතක්-

වර්ණදේහය රුදුරුව

වැඩියෙන් වැගිරුවා මෙලනින්..

ඉතින් උඹ කල්ලෙක්,

තාර කළු කල්ලෙක්..

ඔව්..!

ෆ්ලොයිඩ් උඹ,

සුධාවල ලෝකයක,

තිත්ත කළුවර තිතක්..

නැවුම් කිරි කොතළයට,

අතහැරුණු ගොම බිඳක්..

ගෙල සිරවුනේ එහෙයිනි,

සුදෝ සුදු පයකින්,

ජීවිතය ඉල්ලූ 

අවසාන මොහොතේදිත්...

ජීවිතය ඩොලර් විස්සක්,

ඔව් ෆ්ලොයිඩ්,

ජීවිතය ඩොලර් විස්සක්..!

-මුදිත්-

31.05.2020

පසු සටහන: 

කළු ජාතිකයෙකු වන "ජෝර්ජ් ෆ්ලොයිඩ්" නැමැත්තා ඉකුත් විසිපස් වැනිදා අමෙරිකාවේ මිනෙසොටා හි දී සුදු ජාතික පොලිස් නිලදරුවකු විසින් අත්අඩංගුවට ගැනීමට සැරසෙන්නේ ඩොලර් විස්සක සොර මුදල් නෝට්ටුවක් භාවිතා කිරීමේ වරදට සැකපිට ය. එහිදී ෆ්ලොයිඩ් විසින් අත්අඩංගුවට පත්වීම ප්‍රතික්ෂේප කිරීම හේතුවෙන් "ඩෙරෙක් චෝවින්" නම් වන අදාල නිලධාරියා විසින් සැකකරු බිම පෙරලා මිනිත්තු නවයකට ආසන්න වේලාවක් සිය දණහිසින් සැකකරුගේ ගෙල තෙරපා ගෙන හිඳියි. තමාට හුස්ම ගත නොහැකි යයි ෆ්ලොයිඩ් ආයාසයෙන් පවසා හිඳිද්දීත් දිගින් දිගටම එසේ හිඳීම හේතුවෙන් ෆ්ලොයිඩ් මිය යන්නේ මරණ මංචකයේදී "mommy.. mommy..." ලෙස සිය මව ඉල්ලා යදිමිනි .

සැලකිය යුතු පිරිසක් අවට රැස්වී හිඳිද්දීත් මෙසේ ෆ්ලොයිඩ්ගේ මරණය සිදුවීම පිටුපස ඇති සමාජ-දේශපාලනික කරුණු තම තම නැණ පමණින් කියවා ගැනීම ඔබට භාර කරන්නේ, සිරි ලංකාව වැනි රටක පවා වෙනත් පැහැයකින්, වෙනත් හැඩයකින් සිදු වූ මීට නෑකම් කියන්නා වූ සිදුවීම් මෑත ඉතිහාසයේ ද දුලබ නොවූ බැවිනි. කෙසේ හෝ, ඇමෙරිකානුවන් විසින් වරක් කළු ජාතිකයෙකු ස්වකීය රටෙහි ප්‍රධාන පුරවැසියා කළ ද මානව සංහතිය තුළ ඔඩුදුවා ඇති වර්ගවාදී විසරය සුවපත් කිරීමෙහිලා වන සැබෑ පිළියම එවැනි "තෙල් ඉලීමකින්" එහා ගිය ප්‍රතිකාරයක් විය යුතු බව, වටහා ගත යුතුව තිබේ.

-මුදිත්-