මිනිස් සන්තානය ඇතුලෙ බලාපොරොත්තු සහ ආශාවන් ට තියෙන්නෙ මොන විදිහක වටිනාකමක් ද? එහෙමත් නැත්නම් මිනිහෙකුට ආශාවක්, බලාපොරොත්තුවක් කියන්නෙ මොන ආකාරයක දෙයක් ද? සරලවම කියනවා නම්, මිනිහෙක්ව ඊළඟ තත්පරය වෙනුවෙන් තමන්ගෙ ජීවිතයට අලවලා තියාගන්න මැලියම වෙන්නෙ බලාපොරොත්තු සහ ආශාවන්. ඒ අර්ථයෙන්, ආශාවන් සහ බලාපොරොත්තු මිනිසාව ජීවත් කරවනවා. නමුත් යම් මොහොතකදි මේ බලාපොරොත්තුවක, එහෙමත් නැත්නම් අසීමිත ආශාවක වෙන බිඳවැටීම ඒ පුද්ගලයාගෙ ජීවිතයෙ මොන විදියෙ කඩාවැටීමකට හේතු වේවිද..?
Anthony කියන්නෙ නළුවෙක් වෙන්න හීන දැකපු මනුස්සයෙක්. වගකීම් වලින් මිදුනු සෙල්ලක්කාර ජීවිතයකට ආසා කරපු මනුස්සයෙක්. කොහොම නමුත් චිත්රපටි කීපයක සුළු චරිතයකට දෙකකට තමන්ගෙ මේ නළු හීනය සීමා කරන්න Anthony ට සිද්ධ වෙනවා. ඒ වගේම වගකීම් විරහිතව, විවිධ කාන්තාවන් ඇසුරේ ගෙවන්න ආසා කරපු ජීවිතය වෙනුවට විවාපත් වෙලා, දරුවෙක් බලාපොරොත්තුවෙන් ඉන්න තමන්ගෙ බිරිඳගෙත්, ඒ වගේම තමන්ගෙ අම්මගෙත් වගකීම් බර පැටවුනු ජීවිතයක් ගෙවන්නත් සිද්ධ වෙනවා.
Adam කියන්නෙ ඉතිහාසය ආචාර්යවරයෙක් විදියට රැකියාව කරන, ඒකාකාර නීරස ජීවිතයක් ගෙවන මනුස්සයෙක්. ආශාවන් අවුලනසුළු පෙම්වතියක් ඔහුට හිටියා වුනත් ඇය එක්ක තියෙන කායික සම්බන්ධය පවා අර කියපු ඒකාකාර රටාවේම තවත් එක සිදුවීමක් විතරයි.
චිත්රපටය පටන්ගැන්මේ ඉඳන්ම චිත්රපටය පුරා ඇඳෙන කුතුහලය මිශ්ර 'වෙනස්' හැඟීම තියෙනවා වුනත් චිත්රපටයෙ එක පීක් එකක් විදියට, මුලින් කියපු චරිත දෙක ප්රේක්ෂකයාට දකින්න ලැබෙන අවස්ථාව හඳුන්වන්න පුළුවන්. ඇත්තෙන් ම Anthony සහ Adam දෙන්නා රූපයෙන් සර්වසමයි. තවත් ටිකක් ඉස්සරහට මේ ආඛ්යානය ගලාගෙන යද්දි මේ දෙන්නාගෙ කටහඬවල් පවා සර්වසම බව පේන්න ගන්නවා. මේ විදියට ගලාගෙන යන චිත්රපටයෙ කෙළවර මොන වගේ එකක් වේවිද? ඇත්තටම Anthony සහ Adam කියන්නෙ කවුද? චිත්රපටයට අනුව Anthony ගෙ ජීවිතයට Adam ගෙ පැමිණීමත්, ඒ වගේම Adam ගෙ ජීවිතයට Anthony ගෙ පැමිණීමත් කියන කාරණාව මේ චරිත දෙකට කොයි විදියෙ බලපෑමක් වේවිද..?
ඉතින්, මේ කියපු චරිත ද්විත්වය විසින් ඔබට මට කියන්න උත්සාහ කරන යම් දෙයක් තියෙනවා. ඒ තමයි දිනෙක ඔබටත් මටත් මුණ ගැහෙන්න ඉඩ තියෙන සතුරෙක් ගැන. චිත්රපටය ඉඳුල් කරන්නෙ නැතිව කතාව මීට වඩා එහාට කියන් යන්න අමාරුයි. Anthony සහ Adam යන චරිත ද්විත්වයටම පණ පොවමින් Jake Gyllenhaal, psychological thrillers ඇතුලෙ තියපු තමන්ගෙ ලකුණ ඒ විදියටම මේ චිත්රපටය ඇතුලෙත් තියලා තියෙනවා. ඒ වගේම Denis Villeneuve ගෙ අධ්යක්ෂනයත්, ඇහැටත් මනසටත් අමිහිරි නොවෙන විදියට චිත්රපටයෙ ආඛ්යානය ඇතුලට රූපක ගෙන ආපු විදියත් මේ කෙටි සටහන ඇතුලෙ මතක් කළ යුතුමයි. මෙතැනින් ඔබ්බට චිත්රපටය නැරඹීම ඔබට ඉතිරි කරලා, චිත්රපටය ආරම්භ වෙන තැනින් මම සටහන අවසාන කරන්නම්.
" Chaos is order yet undeciphered"
මම හිතන්නෙ ඔබේ movie list එක ඇතුලෙ මේ චිත්රපටයට ඉඩක් වෙන්විය යුතුමයි.
-මුදිත්-
2021.10.31
