සන්ධ්‍යාව මගහැර - දැන් ඉතින් රාත්‍රිය...

නිමිත්ත: දහවල ද, සන්ධ්‍යාව ද සේවා මුරයට ම සින්න වී ගිය වකවානුවේ- එක් දිනයක, සේවා මුරය නිම වී කුලී කාමරය බලා එන අතරමගදී ඈත තුරු හිසක් මත දුටු, දවසේ අවසාන රන් පැහැ සේයාව ඇසිල්ලෙන් අතුරුදන් විය. 

තුරු හිස් මුදුන් මත වැතිරෙයි

සන්ධ්‍යාව ඉහිරවූ රන් පාට,

අවසාන බිඳුව තෙක්

පඬු පෙඟී ගිය පසුව

මෙන්න ඒ වළාකුල ඇස ගාව..

ඇසිපියක් සැලෙන කොට

කඳු වලල්ලෙන් පැන

නිම්නයට ගොඩවදියි රෑ පාන,

උස් ම කඳු මුදුන වුව,

අඩදැණියි අන්න ඒ, රැය ගාව..

සායම් ලූ ඉසව් පිරිමැද,

බෝඩිම්කාර සිත ගාල් කර

ඝණ අන්ධකාරයෙහි හරි මැද,

ගණා'ඳුර මය ගෘහපති

එතැන් සිට

සිත් මූකලානෙහි රජයන...

-මුදිත්-

2020.10.16

Painting: Darkness Like A Screen, Light Like a Halo," by Patrick Aaron