පුතාගේ චිත්‍රය...

තාත්තේ..!
තාත්තේ...!!
මං ඇන්ද චිත්‍රේට
හම්බුණා තරු තුනක්...!!!
තරඟෙකට තෝරන්න
හෙට ගේන්නෙයි කිව්ව..
මට ඕන සායම් එකක්...

රතු ම රතුපාට ඉර
ගස් වලට කොළ පාට
මූද තද නිල් පාට...
බෝට්ටුව "සාමය" ට
තනිකරම සුදු පාට...
හැන්දෑවෙ කරුවලට
එක වගෙයි කවුරුත්ම
තාත්තට මාමලට
ඒ හින්ද අළු පාට...

******

වැල්ල දිග විසිර ගිය
කටු රූප අහුලගෙන
කඩදහිය උඩ තියා
පුතා දුර සිහිනයක...

ළපටි හිත නොහඬවා
කියා දෙන්නද කෝම..

ජීවිතේ වසාලුව
මේ අඳුරු අවපාට,
මිල වැඩියි තවරන්න
මයෙ පුතේ පින්සලට...

                                       -මුදිත්-
                                2015.11.03